Blog Minangkabau -- Antah apo nan jadi panyabab. Hati ko dalam bara hari ko rasonyo dak lamak. Sampai makan jo minum pun dak lamak sanak. Tapi a ka dayo badan ko. Lah di cari ka ilia di cari ka mudiak nan jadi bala nyo dak jo basobok. Alah ditimbang, ditimang jo di pikian masak-masak tapi dak jo basuo. Antahlah...
Kironyo nan jadi pangka bala nyo dek ulah sibuk jo karajo sampai lupo jo sumbayang. Lupo mangana nan Ciek, Lupo mangana nan di Ateh. Sumbayang acok lupo. Kalau pun sumbayang acok idak tapek wakatu. Ba a hati ka tanang, Nan punyo hati tu bana nan batingga an. Nan punyo kahidupan tu bana nan balupoan.
Tambah ciek lai, Lai bagaji walau ketek, tapi lupo ma agiah Rang Gaek. Mantang-mantang Rang Gaek idak mamintak. Awak icak-icak dak tau atau mungkin icak-icak dak takana untuak mangirim pitih untuak baliau di kampuang. Lupo minta restu Urang Gaek. Lupo mintak doa dari Rang Gaek. Iko nan acok lupo bana. Padahal iko nan paralu bana mah. Rido Rang Gaek ko ibaraik palancar jo palicin. Baik tu di dunia maupun isuak di akhiraik. Batua atau Batua?? Co lah inok manuangan dek Sanak.