Blog Minangkabau -- Kalau di baco Pituah Urang Tuo ka Nan Mudo di Minangkabau ko yo subana banyak. Mulai dari baso Minang saisuak sampai baso Indomi anak mudao jaman now. Nah Untuak dunsanak nan sadang mancari jo manyilau nyilau contoh pituah Minang untuak nan Mudo. Blog Minang ko tampek nan tapek. Sambia mangopi jo nonton striming Sanak bisa mancaliak caliak di blog Minang ko.
Sanak bisa mangopi isi blog ko asa sanak jo sanang hati mambuek an link jo tautan sumbernyo. Tapi jiko idak tu ka ba a jo lai. Tu yo jo nan di Ateh se Sanak baurusan mah. Nan ambo sacaro pribadi an punyo Lapak nio kito bakarilaan jo ba elok elok dalam hiduik ko. Tamasuak hiduik di dunia maya ko.
Ba a kiro kiro Sanak? Lai ka raso tamakan? Kok lai lah kali. Baco lah Pituah nan di bawah ko.
Idak batanggang ba habih minyak
Dak nyo bak siang ba habih hari
Namuah batanyo rajin manyimak
Kalau baraja jo sapanuah hati
Jikok bakato di bawah-bawah
Kok nyo manyauk di ilia-ilia
Indak nyo suko mahajan tuah
Bakato sopan indak manggisia
Pandai manggantang aie lauik
Pandai manyalam dalam bumi
Tau di rantiang ka manyangkuik
Pandai mangaji baso jo basi
Indak mangecek ba hati kusuik
Muko nan janiah di nampakkan
Walau harimau di dalam paruik
Kambiang juo nan di kaluakan
Bujang minang si bujang ramah
Tak dangki jo tinggi hati
Galak manih kucindan murah
Di sayang urang sanagari
Pandai ma uleh rumin putuih
Tau di bayang kato tibo
Tinggi taratik jo mujilih
Paga adaik benteng pusako
Hati lapang paham tak sampik
Pandai maninbang jo manaka
Walau batenggang di nan rumik
Indak bakisa di nan bana
Tau di rantiang ka mancucuak
Tau di dahan ka ma nimpo
Tau di ratak sabalun lapuak
Bujang arih rang bijak sano
Di nan dalam tak bagalombang
Di nan dangka nyo tak bariak
Di sakik hiduik indak tagamang
Ka nan kuaso inyo mamintak
Kalau baragiah jo mambari
Indak maharok baleh jaso
Jariah nan indak di kanalai
Bia nan satu manilai nyo
Iman nyo taguah bapandirian
Ba istiqamah ba tauhid pulo
Dek kawan-kawan jadi panutan
Rang kampuang sayang kasadoannyo
Indak barajo ka hati surang
Ba sutan ka mato inyo tido
Kayo katampek rang batenggang
Cadiak ka bakeh rang batanyo
Ibaraik baringin di tangah padang
Uraik tahujam ka palito
Aka nyo kuaik baurek tunggang
Panuah lah bumi dek rumpun nyo
Dek gampo indak taruntuahkan
Takkan nyo tumbang dek limbubu
Dek badai indak ta olengkan
Kononlah lah goyang angin lalu
Bapucuak cewang ka udaro
Tinggi manggapai awan biru
Kok urek nyo tampek baselo
Jadi pidoman musafia lalu
Sungguah batang tinggi manjulang
Tapi tinggi nyo manaungi
Dahan nanrampak ka bagantuang
Jikalau paneh ka payuang panji
Alah tatuah di ranah minang
Bujang minang rang bijaksano
Manyingguang urang inyo bapantang
Apo lai gadang nan ka malendo
Jikok bakato indak manyingguang
Kok bapambari jo randah hati
Jadi panutan dek urang kampuang
Sumarak urang sa nagari
Bak nantun lah pituah rang tuo untuak rang Mudo di Minangkabau. Mudah-mudahan ado munfaatnyo untuak Sanak nan mambaco jo bakunjuang ka Lapak ambo. Blog Minangkabau, Minang Bana!!!