Kumpulan Contoh Pidato Pasambahan Adat, Ma-anta Marapulai
Sanak sadang mancari contoh pidato pasambahan adek ma anta marapulai? Di siko di blog ko tampek nan talek mancari sagalo hal tantang minangkabau. Mulai dari pituah, pidato adek atau kaba barito tantang Minangkabau saisuak, kini jo nan ka tibo.Di bawah ko awak agiahan contoh pidato adek ma anta marapulai nan awak kutip dari buku pasambahan adek. Mudah-mudahan baguno untuak dunsanak jo manambah referensi pidato adek nan sanak punya. Ba a gak ti? Lai raso ka tamakan? Kok lai di bacolah sampai abih jo di bagian di pezbuk, twitter jo sosmed lain. Bia sanak nan lain tau lo jo pidato pasambahan adek ma anta marapulai ko. Tarimo kasih alah bakunjuang ko blog ko sanak. Salam sukses.
Assalamu’alaikum Datuak,
Ba’a nyoDatuak -sianu- , pado datuak tibonyo sambah. Sungguahpun datuak surang nan disambah, tagah dek adat jo pusako, dek barieh cupak jo gantang, dek alua datuak kasamonyo, kami datang maantakan sambah.
Adopun sambah nan ka ditunggangkan pado datuak, talewah ka nan banyak…,
Bak manuruik adat kito juo, kok basiang di nan tumbuah, jikok manimbang di nan ado, tumbuah sarupo iko kini. Sandi andiko dalam kampuang, di datuak tampuak tangkainyo. Inggiran silang jo salisiah, kusuik di datuak salasainyo, karuah di datuak ka janiahnyo. Ibaraik diri badan datuak, kayu gadang di tangah padang, baurek limbago matan, kabatang sandi andiko, badahan cupak jo gantang, barantiang barieh balabeh, badaun rimbun dek adat, babungo mungkin jo patuik, babuah kato nan bana. Buliah baselo di ureknyo, buliah basanda di batangnyo, kagantuangan cupak nan duo.Partamo cupak usali, kaduo cupak buatan.
Cupak usali iyo nan sakundi-kundinyo, nan sapantiang tali bajak, kupang jo ameh masuak pulo. Nan ganok duo baleh, taiyeh dikikia bahabih basi, dibasuah bahabih ayie, dianjak indaknyo mati, dibubuik tak namuah layua, itu nan banamo cupak usali.
Nan tasabuik cupak buatan, nan batapuang kapua jo sadah, baliciek pinang jo gambia. Sasuai mangko manjadi, saukua mangko takanai. Kok datang hujan jo paneh, batiuik angina jo ribuik, sabarieh bapantang hilang, sabarieh tak namuah lupo.
Lah janiah cahayo adat, lah tarang bangun pusako, bak rumpuik ditimpo rinyai, musim pabilo lipua lai.
Salangkah turun dari ranjang, dari tangah rumah di kampuang etan, barieh tabantang kami turuik, labuah nan goloang kami tampuah, datang ka jorong kampuang datuak.
Kok tibo alah baduduak-an, lah ta unjuak sirieh di carano, tando lah sudah minum makan, Nan sakarang iko kini, pihak di diri marapulai, lah duduak di ateh rumah. Duduak di ruang rumah nan gadang, dilingkuang niniak jo mamak, di hadapan ibu jo bapo, sarato ipa dengan bisan, cukuik jo urang mudo matah, lah duduak basandiang duo, nan bak bulan jo matohari, bintang kujaraha mangaliliang.
Kok tumbuah di tangah rumah, kajadi adat bijo nan baiak, katungkek pamanih jalan, kakarieh pamaga adat, dalam adat baradat pulo. Kok elok ratak tangannyo, panjang bao kamangarek, singkek bao ka mauleh, senteang bao ka mambilai. Kok elok ratak lidahnyo, kusuik bao ka manyalasai, kok karuah dapek mampajaniah, kok ka hilia samo kahilia, ka mudiak samo ka mudiak.
Namun samantang pun baitu, di pihak diri marapulai, raso menitiak niro pinang, antah barayie antah tidak, nan bak alu patah tatimpo, musim pabilo ka bataruak, ibo nan bak padi salibu, awah tumbuah musim talampau, urek tagantuang ka jarami, rangkiang tinggi nan dicinto, supayo datuak tarimo elok-elok, iyo di dalam tapak tangan…, sakian sambah pado datuak.
[Sumber:Pidato Aluah Pasambahan Adat-Idrus Hakimi Dt Penghulu-LKAAM Sumbar-1974]
