Contoh Pidato Adat Minang, Upacara Malewakan Gala di Solok - Pidato adat adalah hal penting yang wajib ada dalam sebuah acara berbau budaya lokal di Minangkabau. Sebut saja acara Malewakan Gala, Batagak Gala atau Upacara adat lainnya. Jika Sanak ingin tahu apa Itu Malewakan Gala, Silahkan Cari di Kolom Pencarian di atas blog ini dengan kata kunci datuak dan malewakan Gala.
Pidato Adat kali ini adalah pidato adat yang biasa dibawakah oleh Datuak atau penghulu di Minangkabau khususnya di daerah Solok dan sekitarnya. Pidato di bawah ini biasanya dibawakan dalam upacara malewakan gala.
Seperti apa contoh pidato adat tersebut? Berikut Contoh Pantun Adat Minang, Upacara Malewakan Gala di Solok. Danak tertarik membacanya bukan? Yuk di simak sampai selesai ya.
Assalamualaikum Wr.Wb Mako dibari ampun lah Kami dek panghulu nan gadang basa batuah, Kami nan indak ka manyabuik namo, balarang bapantang manyabuik gala.
Dek panghulu banyak nan batuah, rang gadang banyak nan sati, tuanku banyak nan kiramaik,sati nan bukan kapalang, bak manantang mato hari, bak manapiak mato podang, kok ditantang mato buto, kok disabuik lidah kolu, patah lidah bakeh alah, patah galah biduak tatumbuak, kurang dayuang sampan tak laju.
Sambah jo salam tak babateh,salam takzim bahinggo, nan salirik bandua ditapi,salanggam bandua ditangah, dari paserek kapaseban, lintabuang disalimbaka, dipiriak jo ampu kaki dipusa jo tapak tangan, dari ujuang lalu kapangka, dari tangah lalu katapi lalu menjerok kahilaman.
Halaman carano basa, nan barumpuik saijambaiyani, batu basusun kuliliang nyo, tampek pandeka main podang, tampek nan mudo main catuah, pudiang ameh balik batimba, pudiang hitam tiok suduik, linjuang solo manyolo, limau manih sandaran alu, kamuniang pawutan kudo, cubadak buaiyan baruak, tawa nan ampek manyudahi, sajuak anggoto katujuahnyo.
Allah ta’ala kayo sungguh, Rasul Nabi Muhammad, pangghulu dek kito sakalian alam, dek kudorat nan kuaso irodat nan bakahandak, datang garak dari Allah turun nan dari awang gumawang, bagarak tubuah karano nyawo, bagarak nyawo dek hati, tagarak hati dek niniak kito, mambuek adat mangarang undang, undang luak dengan rantau, luak dibari bapanghulu, rantau diagiah nan barajo.
Didirikan rajo jo urang gadang, ibarat nyawo dengan badan umpamo api dengan asok itulah karih timbalan padang.
Diangkek basa jo panghulu syarikat warih mandirikan nan sapayuang sapatagak, nan salingkuang cupak adat, nan saulu samuaro saranji sakaturunan.
Kamanjadi payuang panji marawa basa, bak umpamo kayu gadang ditangah koto, ureknyo tampak baselo, batangnyo tampek basanda, daun tampek bataduah kahujanan, bakeh balinduang kapanasan, dahan tampek bagantuang, gantuangan adat ampek rupo.
Partamo suri jo tauladan, kaduo ukua dengan jangko, katigo barih jo balabeh, kaampek cupak dengan gantang.
Cupak itu duo parkaro, partamo cupak usali, kaduo cupak buatan, adopun cupak usali nan sakundi-kundio, nan sapatiang tali bajak, ameh jo perak masuak puro, nan gabok duo baleh taieh, dikikiah barabi basi,dibasuah barabi aia, dianjak indak mati, dibubuik indak layua.
Nan kaduo cupak buatan, nan batapuang kapua jo sadah, baracik pinang jo gambia, sasuai mako takanak saukua mako manjadi, pacik arek ganggaman taguah, lahia bathin ujuik nyo satu.
Basyariat ba hakikat, titiak nyato paham mamanjek kato salalu baumpamo barundiang banyak bakiasan, dalam kulik pandanglah isi, di nan lahia batin tabayang, paham babisiak dalam batin, budi manunggu di ulemu.
- Diliek dipandang roman - Disilau dipandang rupi - Sarek panghulu jo pakaian - Martabat nan anam didalamnyo
Partamo badeta panjang bakatuak, bayangan isi dalam kulik, panjang tak dapek kito ukua, leba tak bisa kito bilai, salilik lingakran kaniang, ikek satuang jo kapalo, tiok katuak baundang-undang, tiok liko aka manjala, dalam karuik budi marangkak, walau nan lahia tampak dek mato, nan batin tasimpan dalam itu.
Kaduo babaju hitam gadang langan, sibak batanti baliak batimba, mangilek mangalimantang, nan babalah hinggo dado, tandonyo baalam leba bumi nyo lapang, gunuang tak runtuah karano kabuik, lawik tak karuah karano ikan, pahik manih pandai maluluah, rang gadang martabatnyo saba, batimbun dandam jo sangketo, jo lapang hati mandamaikan.
Katigo sarawa hitam gadang kaki, kapanampuah jalan nan pasa, kapanuruik aluah nan luruih, langkah salasai baukuran, adat jo syarak mambatasi, tanah kudoran di nan hitam paham hakikat tahan topo, nak kokoh paham dikunci I tikad pantang bakisa, santuang paham pandapek budi, dibudi haluih batamunyo.
Kaampek serong sabidang sabateh lutuik, patuik senteang tak buliah dalam, patuik dalam tak buliah senteang, karajo hati kasadonyo, nak mulia tapati janji, walau bak mano maro malintang, baguluang ombak kiri jo kanan, namun ikarah tatap dihuni, tibo dijanji bajalang juo.
Kalimo batungkek kayu bodi ujuang tanduak kapalo perak, kapanungkek adat jo pusako, barih tatagak nak jan condong, kok condong nak jan kamari rabah, gantang tagak jo lanjuangan, sumpik nan badiri jo isinyo, sako nak tatap jo inggaran, nak badiri adat jo limbago.
Nan ka anam bakarih sikati muno, sisampiang jo cawek katampeknyo, tasisiak condong kakida, dikesong mako dicabuik, bengkoknyo allahurabbi, tapi luruih makanan banang bantuak dimakan siku-siku, runciang tak rago dek barawik, tajam tak rago dek baasah, kokoh tak rago dek ambalau, kok guyah bapantang tangga.
Tapi samantangpun baitu ingek sabalum kanai malantai sabalum luluih, mamagang ulu kok tak pandai, saluki jo simpai kok baganggang, puntiang tangga mato tabuang, ulu diratak dek ambalau, hilang amanat runtuah lah sako.
Alamat kadimakan biso kawi, sanan lakek sumpa satia niniak moyang, kaateh indak bapucuak kabawah indak baurek, ditangah dilariek kumbang, nan bak karakok diateh batu, hiduik sagan mati tak namuah, apo gunonyo hiduik kito. Manyurek ateh pintu, mangarang ditapak tangan malompek nak basitumpu mancancang nak balandasan
Di Datuak tibonyo panyambahan. Nan kajadi buah baba dek kami tu kini, lah taniat dalam hati, talinteh di angan-angan, bak papatah kato adat patitih cupak jo gantang.
Ramo ramo sikumbang janti katik endah pulang bakudo patah tumbuah hilang baganti, sako nak dipakai dek nan mudo.
Nak mamkaikan baju nan talipek, kapai tampek batanyo,kapulang bakeh babarito, hutang kamambayia piutang ka manarimokan, iyo nak malewakan gala, nak izin dari Datuak… sarato isi jamu kami, sakian panyombahan pado Datuak.
Catatan Penting,
Selesai malewakan gala dan nama orang yang diangkat, lalu disampaikan alua pasambahan di bawah ini…..
Angku Datuak…. Bakek angku kato sapatah, nan kajadi buah bana dek ambo tu kini iyo bak pituah Datuak juo.
Anak itiak anak angso,bari makan dalam banda, kok ketek himbaukan namo, gadang alah dilewakan gala.
Kok tumbuah disalah mintak disapo, kok sasek mintak ditaguah, nak dibawo salarang sapantangan, nak dihimbaukan dipasa nan rami dilabuah nan golong, hanyo itu samabah pado Datuak….
Demikianlah Contoh Pidato Adat dalam Malewakan Gala di Daerah Solok. Semoga Contoh Pidato Adat Minang, Upacara Malewakan Gala di Solok di atas bermanfaat. Jangan lupa share ya dunsanak. Terimakasih telah berkunjung dan membacanya.