Pituah Mande Untuak si Upiak, Gadih Minang Nan Jombang
Blog Minangkabau -- Kalau biaso Dunsanak biaso mancaliak Awak mabuek postingan tantang pituah, Pituah nan awak biasa buek kebanyakan pituah nan dari urang tuo laki-laki. Nan kali ko awak cubo malah untuk mambuek Pituah dari urang tuo padusi, atau pituah mande atau nan labiah zaman now biaso di sabuik jo pituah bundo.Pituah bundo, atau pituah Mande atau pituah gaek padusi kali ko ka diposting di ambiak dari bara sumber. Sumber nan tantunyo alah dicaliak elok elok. Dicaliak dima nyo ambiak dima nyo cari dan dima dapek nyo. Haha
Marilah kito cubo bahas pituah mande, pituah bundo. Pituah kali ko tarantuak ka si upiak, Gadih Minang nan jombang, nan baru ka gadang. Supayo idak salah dalam malangkah idak salah dalam babuek. Elok dipandang elok di laku.
Pituah Mande Untuak si Upiak, Gadih Minang Nan Jombang
“Oi nak bungsu Puti Linduang Bulan , upiak kamari malah duduak, elok kito badakek dakek, elok kito bampiang ampiang, nak tahu dipadeh lado, nak tahu dimasin garam, nak dapek paham jo mukasuik, barundiang sapatah duo patah, nak masuak kahati kau, amak kito bapadu badan amak batuluak jo baandaialah kok dapek tu nak kanduang ilmu urang basuami?”
Manyahuik Puti Linduang Bulan: “Kok itu mandeh tanyokan, mandeh malihek tiok hari, hambo indak turun tanah, gilo diateh rumah sajo, indak bajalan kiri kanan , siapo pulo kamaajari?
Mandeh lah lamo manunjuakkan, mandeh lah lupo tantang itu.” Manjawab Puti Cahayo:”O nak denai Puti Linduang Bulan , makan pahamnyo habih2, dangakan pangaja mandeh kanduang, pituah niniak kanduang kau, iyolah ayah kanduang mandeh, bagala Tuanku Rajo Palito.”
Baca Juga Pantun Minang Talago
Tantang ilmu urang basuami, kok sampai anak bajunjuangan , pabaiak piiek kalakuan, paelok laku jo taratik, datang suami dari jauah, sambuiklah jo muko manih, hidangkan minum jo makannyo, paliekkan ati nan suci.
Kok barundiang samo gadang, aibnyo nan usah dibukakkan, sabagaimano akal budi, tutuik dek upiak mati mati, saangok jan mangok, saangin jan buliah lalu, parik paga dianak kanduang tapi usah talampau bana, kok tampak pulo budi awak, manungkuih tulang jo daun taleh, manyuruak dibawah lumbuang, kana pulo tu nak kanduang.
Inyo kok indak datang amek, atau kok inyo indak kunjuang pulang, jan maupek tantang nantun, kana kok inyo sadang sansaro, rida jo saba dipaliekkan, urang saba kasihan Allah. Kok maraso raso juo kok indak manyanang diati, liek inyo sadang suko, sadang duduak surang, ajak saketek bakucindan, sambia manyingguang jo kiasan.
Baca Juga Pengertian Alua jo Patuik, anggo jo Tanggo dan Raso jo Pareso
Kalau suami urang baiak, gadang raso dalam atinyo, inyo dicancang jo nan maja, jan dicatuak jo nan tajam Ciek lai bundo katokan tantangan makanan jo minumannyo salalu sadiokan dek upiak, tasaji baiak ateh dulang.
Kok datang urang mananyokanyo dan inyo sadang bajalan, baduto upiak saketek, asuang pitonah jan lalu, baru turun sabantako alun jauah lei inyo bajalan.
Kok anak nak kapakan mamintak izin ka bakeh inyo, kok upiak naiak bendi nan usah sabendi jo urang lain nan bukan dunsanaknyo. Jiko sabendi jo urang lain basingguang kain samo kain itu pantangan urang tuo, mato palingan setan, ati palingan Allah, abih gili dek galitik, hilang malu dek biaso.
Baca juga Makna dan Arti Ukiran yang ada di Rumah Gadang Minangkabau
Kok padusi indak pamalu, jadi cacek saumua hiduik, bak pintu indak bapasak, mudah rang maliang mamasuki, bak parahu indak bakamudi, biaso sasek dalam balayia.
Oh upiak sibiran tulang, pagang bana pituah mandeh, buhua dalam kabek pinggang, buruak urang dek lakunyo, roman nan indak dapek diubah tapi laku jo parangai lai dapek.
Kok basuo jo urang lain kok duduak ditangah rami atau didalam alek jamu, caliak nan usah dipatinggi, mato usah dipalia, pandang sakali lalu sajo, usah galak dipabahak.
Lambak nan dari pado itu, sopan dan santun tak babateh, baso jo basi tak bahinggo, bia jo laki awak bana, janlah ilang baso basi, pamanih muluik upiak tu, gadangkan inyo ditangah rami, muliakan inyo dimuko rapek.
Baca Juga Pituah Minang Lainnya di BlogMinangkabau.com
Nah itulah kio-kiro sanak. Pituah Mande Untuak si Upiak, Gadih Minang Nan Jombang. Silahkan di bagikan di sosial media sanak kasadanyo, mano tau jikok banyak anak gadih Minang jaman Now nan mambaco tarubah juo parangai anak jo kamanakan kito tu. Kok anak gadih si Upiak Minang nan alah elok laku, Rasaki nyo lancar co aie se mah sanak. Amin. Jikok ado nan taraso jo kurang pado tampeknyo, Ambo mInta maaf.
Di ambiak dari : http://manggopohalamsaiyoblogspotcoid/2011/07/pituah-mandeh-ka-si-upiakhtml?m=1 disarikan tanpa merubah maksud dan tujuan.
